細細聲話俾大家知，由細到大我都好想上郵輪玩！或者係當年鐵達尼號真係太轟動，搞到我一直渴望上郵輪偶遇里安納度(白日夢mode)。不過，次次叫親身邊啲朋友陪我去，佢哋都話：「唔係啊嘛！老餅嘢好悶㗎喎！」一次又一次被拒絕！
最近獲雲頂夢號邀請體驗佢哋嚟緊9月同10月舉行嘅啤酒節menu，喂！做嘢mode啟動！即刻夾咗同事陪我上船！海上啤酒節活動都算幾豐富，有啤酒瑜伽、啤酒spa(試得過！做完啲頭髮好似楊采妮咁滑)、德國傳統美食、港式啤酒火鍋、德國樂隊表演同喪飲啤酒比賽等等。打邊爐飲鬼佬涼茶是常識吧！心諗：啤酒火鍋可以點玩？再望望個餐廳地址—「戶外火鍋」，有中伏感覺。熱辣辣outdoor打邊爐？原來只係我諗多咗，喺海上面吹住海風，真係一啲都唔熱，仲唔怕打完邊爐成身一浸味添！加入特別食材熬製嘅湯底，上枱時俾埋支啤酒你按喜好加入，啖湯真係特別甜啲，仲帶有麥香！特別一提嘅係佢哋嘅醬料選擇豐富，有佢哋調配嘅泰式辣醬、南乳同老乾媽醬等等，對於有選擇困難症嘅我企咗喺度足足10分鐘，真係搵著自己嚟搞！