釣魚？從來沒想過會發生在我身上。需要耐性、以專注換平靜的活動，不適合急躁、目標為本、希望每秒在掌握之中的我。
但人生奇妙處就是無時無刻都有意料之外，對，我去了釣魚；更吊詭的是我竟然樂在其中。作為一個經常估錯自己的人，我想我還是要更懂減少預演，開放體驗。
機緣巧合也有因。家住馬灣，每天外出經過青馬橋都會想：點解橋底咁多船？你哋唔駛返工咩？可以隨便停喺海中間嘅咩？疑問慢慢成為好奇，繼而演變成蠢蠢欲試的衝動。
然後遇到強哥（好馬灣呀個朵！），屋苑街坊，我暫且稱他為「社區資本鄰里關係共享經濟促進者」，定期籌組漁好無窮群組出海。新手欲試，咩都唔識，強哥和其他師兄細心分享經驗、借用釣具、協助拆結掛鉛、連暈浪丸都提供埋，喂駛唔駛咁窩心。
朝八晚五齋坐，我以為會頂唔順，但時間慢慢過，全程平靜不奄悶，重複放索拉絲的動作甚至幾治癒。強哥硬拼四斤青斑，一船六人百魚歸箱，落船回家梳洗，再到小店華記享用當日所獲鮮魚四味八煮，人情味更鮮。
這是香港某角落的某週日。小時候讀豐子愷的《鄰人》，讓我認定鄰舍和諧隨社會發展將不復再。科技發展社會進步改變我們生活，它可以阻隔人和人的溝通的耐性和機會，也可以成為各人的重聚橋樑平台，一切只看我們怎樣善用它。
每逢風吹雨打便有人說馬灣是孤島，自成一格或潛意識成為馬灣居民間更強的凝聚力量。放大馬灣，便是香港、世界。強走一步，人在不孤。