10月8日的「新鴻基地產香港單車節」仲有唔夠一個月就到，今年單車節大使前世界單車冠軍黃金寶(阿寶)就特別去找尋民間隱世單車高手雄哥，拍攝宣傳短片，片中兩人惺惺相惜。條片今日起在旅發局社交平台有得睇。
同阿寶一見如故的，是來自深水埗的「重量級」單車高手、身形魁梧、中氣十足的雄哥，佢30年前開始以單車送石油氣，依家65歲，仍天天在馬路穿梭送貨，能夠同黃金寶合作拍宣傳片，雄哥十分興奮。兩位車神在短片中除了分享在不同賽道上的踩單車秘訣外，阿寶在鏡頭外亦對雄哥那輛經特別改裝的單車大感興趣。
原來，雄哥的單車已有50年歷史，單車本身重逾120斤，若再加上七支「大氣」，單車負重更近500斤。阿寶平日踩開以炭纖維製造、非常輕身的公路單車，當日膽粗粗試踩呢部「重量級」單車，都要花點時間才能掌控，難怪連見慣大場面的阿寶都話：「香港車壇臥虎藏龍！」阿寶更邀請雄哥參與單車節。