Ray喜歡跑步，留意到今屆特區政府各局長之中，最貼地又最跑得嘅應該係政制及內地事務局局長聶德權(Patrick)，新一期馬會刊物《駿步人生》就搵咗聶局長做封面人物，由小時候住油麻地板間房，小一時舉家獲分配坪石邨公屋單位，講到入政府做公務員31年的種種經歷，尤其是出任社會福利署長和新聞處長的日子最有印象和滿足感。
不過Ray有興趣想知聶局長嘅跑步心得，因為佢今年第三度參加「渣馬」，以2小時04分完成半馬，成績見得人。平日咁忙，都有時間運動十分難得。原來聶局長認同跑步可以訓練意志和紀律，同其他跑友一樣，由掌握呼吸到肌肉和關節不再疼痛，佢都經歷過，看到自己身體有進步和改善，滿足感很大。
「可以有好多理由令你放棄：工作太忙、腳痛，但仍然好想堅持下去......」有時壓力太大，佢就聽著歌掏空腦袋，甚麼也不想；有時就把握時間聽廣播，出一身汗後，問題往往叮一聲有新出路。