每次同瑞典朋友提起自己對亞洲菜嘅思念，瑞典朋友總係會想起皮蛋、豬紅、雞腳、榴槤、鴨舌等等，一啲佢哋認為奇怪嘅亞洲食物，仲要講到耍手擰頭。與其話亞洲人對呢啲食物見怪不怪，倒不如話係瑞典人大驚小怪。因為瑞典自己都有好多「臭名遠播」 嘅食物，今期專欄同大家略略介紹一下其中兩樣。
1. 臭魚(瑞典語：surströmming)—臭魚呢樣瑞典名物，大家都應該唔難聽聞過。臭魚又名鹽醃鯡魚，做法大概係將完全未經煮過嘅鯡魚以唔同濃度嘅鹽醃製數月。呢樣食物源自瑞典北部，一般斯德哥爾摩人，尤其年輕一代其實好少會食。由於味道濃烈，瑞典人一般都會喺戶外、用水浸住嚟開臭魚罐頭，以免衣物沾到魚汁同整到間屋臭晒。瑞典人會以洋蔥碎、薯仔伴臭魚，放喺薄包上面食，食嘅時候仲會配牛奶𠻹。據聞曾經有間室外餐廳搞臭魚之夜，擺咗幾圍招呼客人。結果氣味攻陷整個民居區域，仲臭到上埋新聞𠻹。
2. 豬血布丁(瑞典語：Blodpudding)—雖然瑞典人喜愛食甜，但呢款布丁絕對唔係甜品。豬血布丁主要係由豬血、黑麥粉、啤酒、糖漿，再加唔同香料製成。瑞典人會將血布丁切片，用牛油煎後配以煙肉同越橘醬，食嘅時候仲會配橙汁𠻹。個人覺得豬血布丁嘅味道有啲似聖誕節會食嘅薑餅，而且有少少鹹甜夾雜，咬落粉粉地咁。如果唔係非常肚餓，應該都唔會再試。
瑞典嘅特色食物其實仲有好多，今期就同大家介紹住呢兩樣先，之後再續。