「大家喺自己崗位上做咗一段日子啦，有啲同事已經不知不覺停咗喺個comfort zone度。有啲進取嘅同事會要求加啲新嘢，令自己喺變化嘅Digital Marketing裡面有機會玩吓，長知識。大部分嘅同事就可能繼續現有嘅工作，等待客戶嘅新business plan、期待客戶有新搞作，唔好重複又重複，冇錢做大嘢大家會體諒，唔會放棄嘅。
睇到你哋已經好努力做，石頭都俾你哋鑽出血，不過我同你哋都唔想係咁。我同你哋講過，歡迎任何新諗法，如果係好嘅，一定支持，真喎，由工作上嘅流程到同事間嘅對口，如果有乜問題，只要你出聲一定同你傾，拆掂佢。如果對其他人有影響嘅，唔怕喎，我call會大家坐低『4466』。如果係其他安排嘅，就更簡單啦，贊助大家學書法，玩下藍染，上個星期大家喺公司Facebook page發起齊來做運動，求贊助打天光羽毛球，我哋都不知幾高興，希望大家有時間就郁下啦，病痛都少啲。
有啲同事有揾過我傾下前途，做咗一兩年，好似已經識自己做緊嘅嘢啦，個心就好自然想去外面睇吓，唔係去working holiday，就係話去做NGO，你估個個真係去做NGO咩。如果你喺呢兩年學到嘢，我要恭喜你，如果你喺呢兩年知道自己想要咩，我更加恭喜你。我最唔想見到你哋嗰種assume樣，自己坐喺度估嘅，因為通常都係錯嘅。
我建議大家趁後生打好個底，公司都想大家做嘢開心，學到嘢，我就最憎辦公室政治，最好你哋冇大冇細，唔係冇禮貌嗰隻，係有乜攞出嚟講，有道理嘅贏。最唔開心係有嘢唔講，到有事就嚟埋怨。你覺得人工唔夠，就話我知你覺得值加幾多，我哋一年做兩次appraisal，有同事兩年升三次，應得嘅我哋唔會慳。公司大得快，你哋機會就多啦。如果冇乜嘢嘅，下個月公司旅行玩得開心啲。」
以上的對話每年總會講兩三遍，我相信普遍startup花在找人才，培育人才，留住人才方面的精力應該不會少。戰友們，共勉之。