我都快40歲了，我和同輩的父母，好多唔80都70。十年八載之前，我們這一班友，竟然有幸跟後生一輩被長輩尊稱「廢青」，於是我們的父母一代也被公道地叫成了「廢老」。香港疫症爆發，我們幾位舊同學在Group內互呻，大家的老竇(私家廢老)有多令人費神燒腦。
「我家姐一家三口同我爸媽一齊住，姐夫同姪女啱啱確診咗。」上星期同學A突然通知大家。「咁兩老有冇打疫苗？」其他同學問。「阿媽早幾日先打第一針，阿爸未打。」「佢哋上咗年紀，小心染到麻煩……不如搬離先啦？」「我老竇係嗰啲『唔聽人講嘅老人』，佢到而家都唔肯喺屋企戴返口罩，唉好煩。」這句感言，觸動全部人的神經，個個異口同聲控訴起來。
仍跟父母同住的同學B：「我老竇仲好笑，學人扮驚添呀！」「扮驚？即係點？」「佢早兩日發燒，喺屋企學人戴口罩喎？一到食飯除口罩，唔夠一秒，已經忍唔住講嘢。」「發燒？而家唔簡單㗎喎……」「我話，你喺屋企戴口罩即係怕傳染人啦，咁點解一路對住成枱餸講嘢呢？」「咁你同其他人點呀？」「X，我啱啱講完，佢唔出聲，但又想咳，走咗去廁所門口對住個廁所咳，完全冇揞口，成個廁所都係我哋嘅毛巾面巾。」「你哋有冇做檢測？」「快測咗，未有事。」同學B最後說他越吃越沒心機，發脾氣沒吃下去，然後，他老竇繼續食住飯噴口水。
平時很少搭訕的同學C終於發言：「我阿哥一家又係同我爸媽同住，一次過中晒招。我X到佢啱啱先肯食兩粒止痛藥。」喂大佬！我都未數我阿爸，估唔到大家的父親都已經令人嘔血到咁。他們科學常識普遍低，腦又閉塞，自尊心卻過盛，覺得「後生嗰時有咩風浪未見過吖？」，但又唔知道自己已經唔後生，全部問題加起來就成了最毒的費腦毒。
由於篇幅有限，我今次數唔到我阿爸了(算佢好彩)。但最後我要補充一個消息——同學B的阿爸阿媽及他弟弟，最後全部確診了。 《
黑紙》《100毛》《毛記電視》共同創辦人