現今社會係真係奇奇怪怪，大家有無留意近十幾廿年講廣東話好似都係錯事咁？可能大家有個印象呢樣一定關普教中、關政治事，但想深一層，其實都關你我事。試想一下香港幾時唔係覺得識英文先叫叻？識普通話先叫做醒？有啲家長開口同仔女講英文埋口講普通話，好似講廣東話就係低人一等，係錯事咁。老老實實大家對自己日常講嘅廣東話又認識幾多？
作者│廣東話資料館 出版│亮光文化
本書係好睇嘅，因為從中會睇到好多關於廣東話嘅知識，有啲係成日都會掛喺口邊講，有啲早已俾人遺忘，有啲得個講字而唔知出處。就以書裏面介紹尺牘的用字咁，呢個年代寫信嘅人唔多，箇中用語可能連聽都未聽過，筆者有幸細個時讀過尺牘，睇返啲真係倍感親切。唔好以為啲舊嘢無用，寫公告或信就好有用，唔係好似早排某個協會寫信俾司長公開信，啲格式稱謂亂晒龍，想點呢？出事㗎嘛。仲有啲廣東俗詞如三姑六婆係點嚟，鬧人八婆個八婆又係乜水？俗語背嘅意義，抵死啜核嘅歇後詞……其實，學好英文普通話固之然係好事，對自身嘅語言我哋都應該重視同珍惜，唔係俾人迫到埋身到無咗先嚟後悔就太遲啦。(文：甄昊信)