阿占買咗架新跑車，不斷喺網上炫耀佢啲「人車合一」相，有張仲有佢拖住隻油咗黑色指甲油嘅手。有同事問佢拖住嗰隻手，係咪萬聖節啲道具斷手；又有人話嗰隻手好肥，有啲元蹄feel，撞啱阿占隻手勁多毛，襯到絕。總之，同事重點唔係佢架車，因為大家都憎佢個人冇車品。
車靚人衰，話之架車有幾正，個車主冇品，一樣攞唔到分。我哋每次去客度開會，阿占架跑車只有兩個位，佢一定叫公司最靚嗰個Junior妹妹坐佢車，仲要一上車就自拍，跟住下一秒就post上IG，仲要落埋「#索女兵團」呢個hashtag，老屈人哋做兵。
阿占揸車仲要好似拍緊《殺戮時速》咁，喺條街度狂飆。香港咁塞車，可以點飆呀？佢連20呎距離都唔放過，踩行油上，3呎唔到先急煞車，架車chok過林峰加霆鋒。而當佢見到隔籬條線冇車，佢仲會突然扭軚飄移過去，完全唔理中間嗰條係雙白線，同後面有冇車高速上緊嚟，連《頭文字D》都上埋身，真係搞到隔籬嗰個人都癲呀！
阿占除咗無車品，佢亦好憎填form問公司 claim車錢，一來怕漏報蝕底，二來怕要俾錢先。所以次次佢都叫「索女兵團」拍佢哋張八達通。而開完會佢又一定去油站入返滿成缸油，當然又係叫同事俾住先啦。同事呻，佢出車嗰陣都已經用咗大半缸油，開個會用得幾多？根本搵笨。
除咗靚女，阿占對啲雪藏牌嘅同事特別friend。上星期，佢話請新同事Macy去飲杯咖啡有啲sharing。結果只係喺公司個pantry飲公司嘅咖啡。佢仲同Macy講，佢超速要扣分，叫Macy幫佢頂咗張告票。結果Macy笑住同阿占講：「你唔好做埋啲違法嘢呀，諗都唔好諗。」原來，Macy係做過輔警嘅，佢男朋友仲要係督察，阿占今次真係大失預算。