唔知各位有冇留意到Game界近幾年都好流行「古老當時興」，將啲舊主機當成復刻新產品咁賣。到底邊個搞先連土下座都冇乜印象，但印象中都先後出過紅白機、PlayStation、NEO-GEO、Mega Drive等等復刻，本來對呢樣嘢一向唔多有興趣，亦都好少談論，不過見到SEGA新公布嘅竟然係GAME GEAR micro，就真係覺得「無奸不成商」呢句真係冇講錯。當年GAME GEAR唔講銷量，客觀睇都係失敗產品，掌機定位但用6粒AAA電最多都係玩到一個鐘，就算轉用充電池，都係2個鐘內玩完。今次GAME GEAR micro尺寸直情縮到得手掌咁大，螢幕細到應該同一蚊銀差不多，內置遊戲只有4款，定價係4,980日圓，絕對唔平。最呃錢係你買齊四隻色，先會附送外置嘅螢幕放大鏡俾你幽自己一默。講真，商人不斷復刻證明係有利可圖，不過買嘅人亦都好有趣，土下座都算老人家，但都係代入唔到買嘅人心態，因為回憶留響回憶永遠都係最美麗，我就一定唔幫襯。