作為光榮今年重點無雙作品《戰國無雙5》已經推出，相信唔少fans已經買咗，亦有唔少人持觀望態度。一來今集美術、角色全部大換血，二來光榮自家無雙遊戲都不及代工作品，多少影響信心。先講重點，土下座今次絕對大力推薦，老實講要將建立差不多20年嘅嘢「推倒重來」絕對唔易，背後嘅決心同信心乜都有啲。由2004年第一集開始，主角一直都係真田幸村呢位影響戰國後期東西軍大戰嘅人物，但《戰國無雙5》就由返最熟悉嘅織田信長講起，當初點救德川家康、點打贏今川義元、點平定武田和毛利等，到最後死於本能寺，一切都成為今集嘅劇情。當然，信長嘅歷史唔可能改動太多，但殺佢嘅明智光秀，由出生、經歷、謀反信長嘅原因甚至佢最後嘅生死都好多謎團，可以話有大把空間發揮，於是佢亦成為今集另一主角。由呢兩條劇情主軸講出今集故事，最終「本能寺之變」嘅謎團亦得以解開(當然唔係傾向史實)。劇情係今集重點，玩法亦係近年最似原本無雙嘅作品，各位老玩家期待嘅嘢依然健在，「雜魚」數量之多亦令人極度滿意，輕輕鬆鬆就可以千人斬、過萬連擊，爽度滿分；加上新美術風格非常討好，全部都係型男美女，再用水墨畫風點綴，單係呢點夠晒賞心悅目！遊戲缺點當然有，不過實在唔值得放到大一大，總結一句，絕對要玩！