上回提到，瑞典人鍾意咩都慶祝一餐。當小龍蝦、鬆餅、甘草糖、臭魚等等都有自己專屬節日時，瑞典人又點會滿足於只慶祝一年一度嘅生日？今次想同大家介紹嘅係Namnsdag──命名日！
名字同生日一樣，不論窮或富，人人都有，係最好嘅慶祝理由。除咗元旦、聖誕、復活節等嘅特別日子，幾乎每日都係唔同名字嘅Namnsdag。例如香港人熟悉嘅名字Emma，Namnsdag落於每年嘅7月23號。又例如梗有一個喺左近嘅阿Paul，Namnsdag落於每年嘅1月25號。
關於Namnsdag嘅迷信嘢都有唔少，例如每年七月有一個星期叫Fruntimmersveckan，意思類似係「女性星期」。因為呢個星期除咗第一日，全星期嘅Namnsdag都屬女仔名。傳統講法話呢個星期通常都會鬱鬱悶悶落大雨，不過個人就覺得唔係好準喇。
唔少瑞典人都用複名，例如Marie-Louise。Maria嘅Namnsdag係2月28，而Louise嘅Namnsdag則喺8月25。估下瑞典人會選擇邊個Namnsdag嚟慶祝？冇錯喇，佢哋兩日都會慶祝，而且並唔會輕輕帶過，同生日一樣會食蛋糕、折禮物。所以話瑞典人單係慶祝都已經可以好忙。
根據統計，2019年最受歡迎嘅瑞典BB女名頭三名分別係Alice、Olivia同Astrid，BB仔則係Lucas、Liam同William。而瑞典大人中，最普遍嘅女性名字頭五位分別係Maria、Anna、Margareta、Elisabeth同Eva，而男性名字嘅頭五位則係Erik、Lars、Karl、Anders同Johan。唔知呢堆名字有冇你份呢？有時間不妨上網搜尋「Svenska namnsdagar lista」，即係瑞典命名日列表咁解。搵搵自己同家人嘅Namnsdag落咗喺幾時，好好記住再慶祝一番。就當係俾自己、愛人同家人多一個快樂嘅理由啦！