出稿時剛剛趕得上Ubisoft本月大作《芬尼克斯傳說》(Immortals: Fenyx Rising)，相比去年，今年Ubi最少有《刺客教條》座鎮，加上《看門狗：自由軍團》，氣勢好過上年好多。但佢哋鍾意將啲大作逼埋一齊嘅習慣就好似冇改，結果就令到《芬尼克斯傳說》似乎少咗話題，畢竟連土下座都未玩完《刺客》。至於呢隻遊戲外國Reviews已早早出晒，唔少Game網都大讚，有啲更寫到明係對《薩爾達傳說：曠野之息》嘅最高「致敬」。其實土下座已經玩早大家幾日，個人感覺真係相當唔錯，非常值得一玩，特別係如果你未玩過《曠野之息》的話。你話似唔似《曠野之息》？講真一句就真係似過《原神》(不過《原神》嘅問題又點止抄曠野之息)，特別係玩法上，例如需要用類似磁力裝置去搬動機關之類，玩落真係有似層層嘅感覺。不過相比下，《芬尼克斯傳說》喺動作及戰鬥系統方面就絕對豐富，而且講到做開放世界遊戲，Ubisoft都係遊戲界公認數一數二，嗰種去到邊都好似會有新嘢嘅「毒性」，未必間間Game廠做到，所以當你習慣咗之後，又會開始覺得有玩緊《刺客》嘅感覺，再簡單講，似《曠野之息》係表面，骨子裡都係好Ubisoft囉！
日報