上次土下座提到《英雄聯盟：激鬥峽谷(League of Legends: Wild Rift)》因為喺 iPhone 12發布會突然「站台」，估計推出之期可望見家鄉。土下座收到風10月27日遊戲就會雙平台全面開放公測！對Fans嚟講肯定係個好消息，不過可惜嘅係，公測其實係有限度地針對地區而開放，首批有印尼、日本、馬來西亞、菲律賓、新加坡、南韓同泰國，冇香港份！至於第二次公測就會喺12月開放，同樣可惜嘅係，依然冇香港，但就有台灣！其實遊戲由年中喺海外公測開始，就一直集中東南亞市場，當時台灣就有情報指係因為當地未落實到代理權，台灣代理都係最近先肯定。可能Riot Game係以玩家人數去決定開放地區順序，又可能係香港同中國掛鈎咗，兩地嘅代理問題影響到公測之類，唯一知嘅係香港今年肯定冇份玩，最快都要明年第一季。所以就算iPhone 12玩《LOL》有幾順都好，暫時都唔關我地事囉……