近期app store有隻遊戲喺冇乜宣傳下，霸佔下載榜幾日，講緊就係《高達爭鋒對決》。高達題材加上《VS》玩法，又有劇情模式同即時對戰元素，聽落相當吸引。遊戲操作更加無因為手機平台而大退步，唔同機體有唔同玩法，連step cancel呢啲進階操作都可以做到，畫面方面亦算合格。雖然流暢度不足，玩落都有少少窒，不過有埋聲優同大量機體，點睇都係……必玩？如果係咁就唔需要講咁多嘢啦！
其實《高達爭鋒對決》大陸版已經營運數年，風評唔高連大陸玩家都唔讚，主要係因為完全無平衡度可言，因為遊戲系統同一般大陸「廢課」遊戲完全一樣，機體要升星(等級)、收集碎片、升技能，同時又有駕駛員嘅部分，同樣需要抽卡和收集碎片，而且唔同機體要配返專用駕駛員，先可以出到強力必殺技。所以簡單講，你愈有錢抽機、抽人，就愈容易無腦打爆對手，咩操作技術都係冇用嘅。網上就有人分享，一部垃圾三星機體要升滿已經需要接近萬五蚊，正常主力機體就要接近三萬，而超限定嘅強力機體，例如Exia能天使高達更要超過四萬先升得滿。畢竟香港同大陸文化、地域同人口都相當唔同，所以就算隻game幾差都好，大陸都仍有一定支持者，「男人愛高達」定律始終係通行全世界。但作為香港人嘅大家，相信唔使土下座多講，應該都知要玩「高達」真係大把選擇，正經買部主機又得，去返機舖亦得，何必辛苦自己貼大錢買難受呢？