今期想同大家分享兩個簡單瑞典語：Tack同埋Hej då!
Tack即係唔該、多謝咁解。用法同英文嘅Thank you大致相同，不過形式比較多變：Tack、Tackar、Tack tack、Tack så mycket、Tusen tack都比較常見，分別用於各種場合同心情。另外想同大家分享嘅一句係Hej då。所以相信大家對「Hej」並唔陌生，因為知名瑞典傢俬店門口就大大隻字寫住「Hej」，好難走漏眼。Hej喺瑞典語入面有哈囉嘅意思，而Hej då就係再見咁解。禮多人不怪，嚟瑞典旅遊最緊要都係學識呢幾句。
眨下眼就寫咗呢個專欄兩年，由2018年10月22號刊登嘅第一篇專欄文章《愛自己》，講啲比較心靈嘅嘢，到後期轉咗去遊樂版，開始介紹瑞典嘅風土民情。呢兩年間我學到好多，亦非常喜歡專欄作家嘅身份。不過覺得自己都係時候放慢一下腳步，先專注發掘生活中更多有趣嘅事情，再同大家分享。
好感謝各位am730讀者喺呢兩年期間給予嘅支持，希望每個星期短短嘅五百字曾經有為大家帶嚟一點點嘅樂趣，甚或一個微笑。亦非常感謝所有曾經與我共事嘅am730同事，多謝你哋一路以來嘅包容，希望以後能夠有機會再同大家一起工作呢。
如果大家掛住我嘅噏風，或者想睇多啲我關於瑞典嘅生活點滴，可以Follow我嘅Instagram @sis3ter或者Facebook同名專頁㗎。剛過咗第三個Advent，意味住聖誕節仲有一星期就會到來。祝大家有一個愉快聖誕，平安健康。最後想同大家講句：Tack för allt! Hej då! 衷心感謝大家所給予嘅一切，我哋有緣再見！
一名乾物女，過氣空姐，為愛由北區移居到北歐多年。熱愛地球同時喜歡講粗口，志願是能夠與動物溝通。
fb：為何斯德哥爾摩沒有譚仔三哥 by 三家姐
ig：sis3ter