林海峰最近有首新歌〈蛋撻 EGG TART〉，MV有葛文輝，軟硬天師合體喎，我呢啲70後一定留意啦！一首歌，一個蛋撻，的確盛載着濃濃的香港人情味。
人在英國，怎會不掛念香港的味道？但以為在英國好難找到港式蛋撻？少年，你太年輕了～在英國Manchester，想食港式蛋撻其實唔難，而且很有質素，例如可以去酒樓，金煌大酒樓、太湖酒樓、翠華大酒樓都有得食，而我關餅氏就多數會去China Town幫襯旺旺麵包西餅店。旺旺在2003年創立，開了19年，舖頭唔算好大，但選擇都多，主打港式麵包西餅，我阿女最鍾意食他們的肉鬆包，這裏亦有賣中式糕餅，老婆餅、蓮蓉酥等等，連油炸鬼都有。旺旺的酥皮蛋撻是全店最受歡迎的食品之一，外皮焗得鬆脆，蛋漿嫩滑得來又充滿蛋香，甜度剛剛好，入口完全感受到那份幸福滋味。蛋撻之前賣90便士一個，而家加到£1，兌返匯價不用10蚊港幣，加幅可接受啦！
港式蛋撻的絕配當然是港式奶茶，早前和成班friends行巿集，就認識了一個由香港人主理賣港式樽仔奶茶、鴛鴦的品牌——Teage茶記，路經檔口，見到同聲同氣的檔主，一定要幫襯支持啦。Teage茶記的奶茶有三款口味：Times(原味)、Light(兩少甜)、Free(三少甜)；鴛鴦就有兩種口味：True(濃味)、Pure(清香)，£3.5一樽。大家試完味都話正，茶香奶滑，奶茶、鴛鴦各有擁躉，可惜當日所有現貨都賣晒，店主話可以上網訂購，全個曼城都送貨，買滿4樽免運費，我們一行人一共訂了12樽。上網訂的價錢，一樽£3.79，買多啲價錢就平啲，買滿4樽或以上£3.69/樽；8樽或以上就£3.49/樽；12樽或以上£3.39/樽；16樽或以上£3.29/樽，計起上嚟都三十幾蚊港紙一樽㗎，但間中幫襯下都冇所謂啦！
為了滿足思「香」的味蕾，周不時會跟YouTube大神學嘢，試過和街坊一齊炮製蛋撻，亦和阿女整過菠蘿包，有朋友更有齊茶餐廳沖茶架生，大家齊齊在屋企整下餅沖下茶，絕對是非常happy又可以聯誼的睦鄰活動。
