香港人就是喜歡食，不論在香港或英國，只要有人在社交平台介紹邊度邊度有新餐廳，都會一窩蜂去幫襯。關餅氏是為食之人，亦鍾意試新嘢，上星期在街坊WhatsApp群組有人話在英超曼聯的主場奧脫福球場(Old Trafford Stadium)附近，有一間新開個幾月又賣韓國菜又賣泰菜的小店，即刻冇執輸約埋幾個志同道合的為食朋友走去試試。
新店名字叫PaPa Don，位於曼城的Stretford區，距離球場行路大約廿分鐘便到，揸車更不用5分鐘。雖然有曼城著名景點在附近，但小店隱藏於橫街小巷之中，隔籬是車房，店面裝修又簡單毫不起眼，不是有人介紹，好容易會走漏眼。其實最初對PaPa Don不敢抱甚麼期望，估不到出品有水準有驚喜。我柯打了韓式泡菜豬肉辣湯飯（£11），熱辣辣上枱，在天氣仍有寒意下食特別暖身。朋友們點了泰式海鮮炒河粉（£13）、泰式咖喱豬肉飯（£11）、冬陰功湯河（£12）、水門雞飯（£12）、韓式辣醬雞翼（£6/5件）。
過了食晏時間人客散去，忙個不停的老闆兼廚師Tommy終於可停下來傾談一陣。Tommy是香港人，中學時已來英國讀書，在英國生活了近30年，開舖前都是做飲食業，做過韓國、泰國餐廳，後來創業開了PaPa Don，他說開張個多月，最近生意明顯多咗，現在人客佔八成是香港人。幫襯當日是平日晏晝，但全店都坐滿客，相信是社交媒體的威力，令一間新開張的隱秘小店在短時間內如此多客。當然要繼續客似雲來，出品一定要有質素才可留客，因為社交平台有不少人都會言過其實。幸好今次，我們沒有中伏！