雖然公司有同事話我成日食好西好離地，其實平日返工我都係捱飯盒，非常貼地，不經不覺都喺灣仔食咗十幾年可謂瞭如指掌。近期受到疫情重擊，附近一帶由五光十色變成烏燈黑火，大部分平時食開嘅茶記食肆唔係執笠就係暫時停業，同好多地區一樣剩返賣兩餸飯；就連喺天樂里出名高質嘅小炒店《大排檔小炒》都放下身段轉型賣兩餸飯，喺香港兩餸飯關注組人氣高企，口碑不俗。有一晚喺漆黑中嘅天樂里只有《大排檔小炒》燈火通明，我終於幫襯咗：首先佢飯盒設計係有兩格或三格，然後白飯另上，飯餸分離優點不用多說，個盒仲可以入微波爐。食肉獸嘅我揀咗梅菜肉餅+蒸雞，肉餅肥瘦比例好好，有肥豬肉嘅顆粒感，好有咬口，唔似平時啲cheap cheap死實肉餅；蒸雞亦好足料入味，除咗雞件，有齊冬菇、豆卜、雲耳、臘腸，重點係只賣$35！應該係灣仔最高質，難怪lunch time條人龍咁長，轉型自救成功又一例子，做食肆等政府救？死路一條。
大排檔小炒灣仔分店│灣仔天樂里2-4號金豐商業大廈地下│2515 2222