幾年前金價大跌時，中國大媽築起血肉長城，到香港金舖瘋狂搶金，老外睇到目定口呆，明明看見金價不斷下滑，中國大媽竟然視死如歸，二話不說紛紛掏腰包買金，面上仲洋溢著歡樂笑容，嗰個情景被外國媒體大肆報道，表面寫出壯觀情況，實際暗瓦底笑你中國女人幾無知。
之後幾年，中國大媽見住金價拾級而下，老外繼續暗笑，但大媽真係堅毅不屈，死揸唔走，同自己講長線無問題，部份更話平啲仲會買，呢啲愈平愈買心態，成為國際笑柄。
點知近半年又急轉直下，金價因全球憂慮經濟衰退而開始受關注，特別日元跌勢逆轉，金價開始偷偷回升，到英國脫歐公投前，金價蠢蠢欲動，後尾公投有結果，市場大跌眼鏡下，歐洲局勢不穩，金價更加好似食咗乜藥咁勁升。國際市場投資者亦頻頻開腔，大大看好金價未來走向。
贏咗漂亮一仗？
雖然當年大媽買金時每盎斯平均在一千三百幾蚊美金水平，依家都係大概返家鄉，但勝在人人都認為金價往後會向上，即係話大媽賺錢指日可待，今次仲唔威番次，妳啲老外笑我喇，啲港燦話我哋無知喇，大媽老公因為金價下跌而埋怨喇，呢期一吐污氣，證明中國女人可以頂起半邊天。
解構大媽何解會贏，係咪可以從中學到嘢？首先大媽當年點解喺大跌市仍奮不顧身買金，相反今日金價向好，大媽反而袖手旁觀按兵不動，難道大媽真係深懂低買高賣之道，又或眼光獨到，較諸國際投資者更勝一籌。
投資之道 切忌貪平
Loser認為全部錯，大媽點解掃金，當中道理一字咁淺，就係一字記之若「平」，師奶買嘢，愈平愈買，因為佢哋覺得抵，心理上係唔買咪執輸；千萬別睇少呢個怕執輸精神，有時效果可以好驚人。百貨公司做大滅價，話有幾部電視賣300蚊，師奶不畏萬難，前一日排隊。超市某貨品做特價，可能慳十元八塊，師奶好多時迫滿人都要去搶，事關箇中精髓咪又係怕執輸。
明白呢個道理，你就清楚點解呢勻金價向好，國際投資者同分析員都看高金價一線時，大媽反而唔追買，事關佢覺得開始貴嘛，就係咁簡單。
其實投資之道，首重跟從趨勢，正如曹仁超名句：「有智慧不如趁勢」。投資買賣，炒金、炒股、炒樓都好，最重要緊貼市場趨勢，要睇風向喺邊，特別依家個市，今日唱好明日可以唱衰，長揸輸嘅機會反而大，貪平入市係投資大忌，有幾多次可以好似大媽今次咁好彩？