香港股市自從想當年停市四日以來，市場愈趨成熟，由於機構投資者主導咗八成市場，所以股票上落都係較有理性，唔會亂咁來。但係自從香港同內地股市關聯度日增，再加上滬股通開通之後更引來唔少北水南下買股炒作，香港股票正式步入A股化，可以短時間內大上大落，鍾意炒波幅嘅炒家就真係爽皮。
A股化嘅唔單止係股票，全港各行各業都正在A股化之中。大家行街可能會見到有舖頭只係用簡單易明嘅簡體字、去公園可以欣賞婀娜多姿的大媽舞、過關見到振興經濟嘅水貨客努力工作，等等等等下刪百九幾樣例子。最正嘅係，A股化仲連建築界都搞埋，令前國家主席胡錦濤親臨過嘅啟晴邨名揚四海。
大家唔好誤會，馬暈唔係話呢單「鉛案」嘅責任係要落喺總承建商中國建築身上，成單案最A股化嘅地方係政府嘅態度同埋回應。
回帶睇返高鐵工程延誤呢單慘劇，事件曝光之後，我真係未聽過香港政府一味狂數二判三判嘅不是，而係毫不猶疑咁將個茅頭指向工程最終負責人港鐵，人家個CEO仲要人頭落地 (Sorry，係袋住成褲錢咁落地)；啟晴邨事件，搞到大一大煲，我地上至特首下至署長，無一個人夠膽話要搵總承建商問責，仲要係諗盡辦法為中國建築開脫責任。
最離譜嘅係，政府都未查清楚責任誰熟，就急急腳連個水喉匠個名都公布埋出嚟，仲夠膽死話係應傳媒嘅要求去公布個名。傳媒問親特首問題佢都遊花園唔知遊到去邊啦，問你拎個名你又咁爽手話畀就畀？香港特區政府簡直係將內地政府打太極四兩撥千斤嘅奧義發揮得淋漓盡致。
不過今單料A股化得未夠徹底，因為事件發生喺大陸的話，應該一早就無辦法見到光，任何想話將見事曝光嘅人都會被滅聲，點容得啲白鴿喺到飛飛下拎頭彩，特首喺呢方面真係仲有幾把勁要加！
