一向執法嚴明嘅Jing Cha，擒日真係「做嘢」，放毒蛇咬咗五個司機，順道又去埋Uber辦公室拉人兼封艇，誓要高姿態取締呢個冒起得非常快嘅新興服務。「做嘢」之後網上負評不絕，馬暈唔少中產Friend更加係fb鬧爆Jing Cha，話好多的士佬衰到無人有 (拒載、揀客、濫收車資)又唔拉，係要搞到一班有心去提供優質服務嘅新公司無得撈。
小弟無用過Uber，但以一名普通人嘅目光去睇，都明白佢哋係好Hit中發達社會市場嘅一門新生意。發達社會中產數量多，佢地對於生活質素有要求，但係又未有錢到可以請個司機隨傳隨到，繁忙時間截的士唔容易，最重要係一班中產都可能嫌的士佬Cheap，用Uber Call架高檔轎車，送完你拍拍屁股就可以行得，又點可能唔Hit中呢個市場？
不過法例就係法例，法例唔容許無牌白牌車喺路面接客，無論你點樣走法律罅，包括事先用信用卡喺網上過數畀車資，依家都係畀到執法部門有個位去入，無得好講，但問題係政府有無諗過現時嘅的士服務又的確係過時呢？
唔知大家有無諗過，的士服務過去幾十年其實都係無乜變過，遞手截的士、上車、到達目的地、畀錢走人，幾十年如一日，我地連用八達通或者信用卡畀錢都唔得，稱得上係零演進；但我地嘅社會已經走前咗唔知幾多步，Uber嘅出現就正正係社會進步嘅體現，而我地嘅政府、法律就停滯咗咁多年。站在政府立場你可以話人地唔守法，但從更多人眼中，係政府永遠滯後，行得唔夠前。
偉大嘅領導梁振英早幾日先至話，政府要適度有為，發展經濟必須放棄過時嘅「積極不干預」思維。但單從今次事件，又再一次係積極不干預現有制度嘅行為，你話我知你有為，為咗去邊呀老細？