早前有位匯豐銀行前大班話香港樓市喺1年到年半內會爆破，有啲投資銀行又話香港樓市小陽春完結，加上國際機構話全球最難負擔樓價嘅城市係香港，似乎講到香港樓市岌岌可危。
Loser之前雖然叫大家唔好買樓，但絕對冇認為樓市會爆破，只係從值博率去計算，認為樓價上升空間有限，唔值得咁高價去博，至於你話會爆，我好相信機會十分之低。
「高槓桿」才是樓冧關鍵
首先，喺處先要講明白，所謂樓市爆，起碼要跌3成，否則跌1到兩成，只係屬於調整，唔算爆破。過往經驗，通常要喺一個好「高槓桿」嘅情況下，先至會出現爆破，例如97年香港樓市，啲人借大錢買幾層樓，一跌起上嚟就要掟貨套現，以至出現人踩人情況。
又好似美國次按危機，啲人根本冇能力買樓，但正如電影「沽注一擲」入面講，銀行隨意借錢，連跳脫衣舞女郎都可借到錢買五層樓，你話市況稍為逆轉又或經濟回軟，銀行追差價或啲人唔夠錢供樓，樓市就好容易倒骨牌咁崩毀。
香港真係要多謝金管局，將買樓借貸比例維持喺一個頗安全水平，又引入壓力測試，令啲人係一個安全邊際供樓，即使樓價下跌，都有好大緩衝點，唔會咁易變成負資產。
冇觸發爆煲條件
仲有，今日香港啲地產商負債十分之低，唔似97時，好多地產商孭重債，一旦樓市唔掂，套唔返現金就面臨資金鏈斷裂問題，於是只好低價掟樓，好似當年信和（0083）要急賣樓，大幅減價後令樓價加速下跌。唔好睇少發展商劈價掟樓，新樓盤係市場指標，一旦降價，二手要競爭就要相繼向下勁調，樓市就咁冧落去。
再諗諗，樓市爆破都要有觸發點，一係經濟突然急轉直下，再就係利息直線上升，然而經濟雖然唔係話好好，亦冇話好差勁，整體仍然幾平穩，中國經濟增長亦在百分之六以上；至於利息，即使美國明年加3次息，香港縱然跟亦不會跟足，加幅相對有限，根本構成唔到大壓力，所以你話雞年樓市有乜理由會爆破。