《網上圖片》
人民幣納入國基會(IMF)特別提款權(SDR)後，有人話中國政府唔需要頂住個匯率，人仔會向下調整，但又有人話長遠國際上要吸納人仔，趨勢會向上，究竟邊個啱邊個錯，人言殊異，但Loser就傾向睇淡。
道理好簡單，正如今年五月中我已經寫咗篇《唔好買人仔》，勸人忍吓手，當時的論據今天非但繼續啱用，按現時情況，我更深信人仔下行機會更高。
首先一國貨幣是龍是蟲，好大程度視符當地經濟係點，大家睇睇中國經濟增長，各大投行陸續修訂，好多行估計都係六點幾，世界銀行更調整至今年為6.9%、明年為6.7%、後年只有6.5%，原先分別係7.1%、7%同6.9%。市場唔少認為，倘若唔係中央有政策支持，經濟分分鐘保六都有問題。雖然百分之六唔係差，之但係比起過去就遜色，喺咁環境下，貨幣已缺乏上升基礎。
大家再睇睇，中國政府今年為剌激經濟，先後減息降準，前前後後有五到六次之多，可以講呢個已經成為趨勢，未來要續支持經濟，睇怕再減息機會好高。利率持續向下，匯率就缺乏支持，相信會更加受壓，人仔幣值恐怕繼續走弱。
再講，美國今個月加息機會好高，中線睇美息會續向上，雖然步伐唔會好快，但趨勢就係偏上，結果係美元不斷走強。美金升值之下，新興市場資金會回流到美國，過去中國經濟年年勁升，匯率又持續上揚，啲錢係咁流入，人仔愈升愈有。今時今日資金流走，少咗好多人揸人仔，反倒沽就有增無減，你話幣值又點會好似過往咁理想。
當然，你話大冧就唔會，但再上番去就唔易，反之向下行機會好大，我諗人仔未來一年跌多一成好平常，總之都係嗰句，唔好買人仔。