干卡路
今屆世盃可觀性強，決賽成就經典，除咗分組賽列強尾輪hea踢有悶戰外，兩大元素相輔相成，促成今屆進入淘汰賽變戲肉，入球又多。首先當然係「光頭佬」哥連拿主導嘅FIFA裁判小組，一早落柯打要球證補足比賽時間，計決賽上、下半場補咗共15分鐘，即係場波打咗法定時間超過135分鐘，但大家都知道詐傷拖時間冇用，只見拳拳到肉、節奏明快，入波機會自然多。另外決賽唔計兩個龍門，包括球王美斯同麥巴比只剩7個「鐵人」踢足全場，受惠今屆擴大到准換5個，去到加時法國仲換到7個；教頭放膽換人，入得場嘅後備又深具實力，呢點同英超一樣，大利強隊調動，今屆冇乜球星死撐嚴重受傷。
今屆新舊球王決賽拼死一戰，反而捧上天嘅新星唔多，可能大家喺各大聯賽早被起底，而且一夜成名炒起風險高；但最厲害一定係近年俾大球會長挖長有嘅葡超班霸賓菲加，又爆紅中場安素費南迪斯同前鋒干卡路兩位21歲嘅年輕人，難怪隊波喺國內一枝獨秀、歐聯壓倒PSG首名入16強，二人跳槽日子唔遠咯。