變色大帥舞「獅」
冇份爭霸歐國聯嘅球隊，包括大名鼎鼎嘅三獅英格蘭，會喺今期世盃外率先出場。要知道明年世盃決賽周大搞48隊，南美嗰邊嘅雄師巴西一直hea踢試陣，冇擔心過出唔到線；而歐洲呢邊入圍隊數更多達16隊嘅大戶，而外圍賽開12組，每組首名直接出線，由著名「戰術變色龍」主帥杜曹，初次領軍嘅三獅，同組對手係阿爾巴尼亞、拉脫維亞同安道爾之流，稍為似樣嘅係大賽例走樣嘅塞爾維亞，以杜曹嘅教波級數，食菜咁食。
喺英超踢過9場正選嘅新星左閘路易斯史基利，同就快33歲嘅中堅丹般恩，就成為杜帥嘅國家隊首兩位新人類；反正嚟緊4日兩戰主場先鬥阿爾巴尼亞同拉脫維亞，之後兩鬥安道爾，究竟杜曹會唔會用返四、五年前教車仔時嘅「3-4-2-1」陣式定係繼續創新，好快有答案。係「足球未回家」之前，三獅迷最希望見到愛隊重拾進攻霸氣，哈利卡尼之後，可唔可以磨到第二把尖刀？祖迪比寧咸同迪格蘭賴斯兩大中場發電機，點樣擺位先可以產生更大嘅化學作用？世盃外遇「魚腩」，要變就去盡啲。