反cup有「績」可尋
上周本欄評論，拜仁係「最強生還者」，結果主場先大炒同國宿敵利華古遜；連同歐冠之王皇馬，係8場歐聯16強比賽中，唯一兩隊以附加賽勝方身份，勝出首回合嘅一方，證明改制後要踢10場先入到歐聯16強嘅球隊，實力必然雄厚。
先客後主，主隊應該著數，加上近年已取消作客入球優惠，次回合作客一方要喺法定時間總比數，淨贏多一球反cup，難度更大。史上最難嘅反cup係18/19年歐聯16強，曼聯主場輸0比2俾PSG，但作客靠福仔補時入3比1，作客入球優惠過關。靠主場反cup嘅賽事較多，經典係16/17年PSG主場先贏4比0，但巴塞返地頭贏6比1，咁啱受害者又係PSG。用上周呢8場波套入歷史數據分析，主場輸緊2球或以上嘅燕豪芬、布魯日同飛燕諾等收工；輸緊0比1嘅賓菲加同PSG，要作客反贏「西英一哥」2球，歐聯史上計得3隊做得到。落後緊3球嘅利華，返主場都唔似可成就另一經典；反cup最大希望落喺馬體會，今季6場歐聯勝仗，3場反勝，鬥志又堅，八強未必係鋪定嘅阿仙奴鬥皇馬。