根據英國一個有趣嘅統計，瘋狂英超快車期折損約5%嘅英超兵源，即係有七十多人；最慘嘅係阿士東維拉，正選門將同貴價中鋒一同收咧，上周末英足總盃先俾英冠富咸踢出局，嚟緊又要應付英聯賽盃4強首回合，作客銳得交關嘅李斯特城；主帥留番精兵打護級戰保命，定想要全力爭盃仔暖身，後果自負，只係傳緊佢哋想揾英超舊電池艾迪巴約返嚟打柱躉中鋒，可見冬窗渴市。
弱隊有好中鋒，足以救全家，多年前車仔借盧卡古救西布朗成經典；睇番上屆英超，連保到命嘅白禮頓嗰尾四隊，全部聯賽平均每場入唔夠1球，反而全英超失波最多嘅般尼茅夫排到14位保命，證明入到波攞3分先係護級成功嘅竅門。再睇番現時聯賽榜，平均每場入唔夠1球暫有4隊，兩隊喺降班區；聯賽剛過半程，如果隊波冇番個可靠又健康嘅射手，好易跌落「地獄」英冠。環顧英超現存實用又健康嘅中鋒，必選車仔連足總盃都唔肯用嘅法國箭頭基奧特；邊隊肯俾錢賣斷兼簽佢長約，唔難到手，要保命邊有得慳。