垂死嘅卡迪夫城慘被車仔絕殺，出名火爆嘅英國阿伯領隊禾諾克，完場後走到入場企喺3位球證旁邊，嗰刻無論係寧死不屈定係輸到無奈，都係卡城今季嘅寫照。英冠班底踢英超，又用對上3次一教英超球隊即「衰收尾」嘅阿伯領隊，卡城長期下游掙扎其實預咗。季前禾諾克排喺摩連奴之後，成為第一位被炒領隊嘅次熱門，摩佬先行一步，但年逾七十嘅禾老仍「健在」。不過，上天真係玩弄卡城，隊波今次升班後未好過，冬窗肯使錢救亡，點知射手伊美利安奴沙拿先魂斷英倫海峽；入到波嘅中堅班巴同轉型打箭頭嘅後衛卡林柏達臣，上月先後因傷重提早收工。
冇晒高佬，禾老嗰種「一味靠滾」戰術，威力減半；但卡城咁嘅陣容，都幾乎贏到億萬大軍車仔，要知醜嘅唔只係錯判連連嘅球證，仲有車仔領隊沙利。卡城未「傷」好，明晚起又要連續作客曼城、同級嘅般尼及白禮頓，呢3場波攞唔到起碼4分，今屆英超三支降班隊大定。英冠不用VAR，但應該先係禾老教得最舒服同最唔激心嘅福地。