英超迷嘅心情，突然變得好複雜。今晚究竟係修咸頓定史雲斯，可以喺護級大戰攞晒3分，定係和局繼續吊鹽水？呢兩個位於英國南部嘅城市，筆者都去過睇波，足球大於一切？對於當地居民嚟講未算係。假如冇咗史雲斯，另一支威爾斯球會卡迪夫城，缺席4年後，來季已確認重返英超。如果冇咗更具傳統、92年英超成立首季已有份參賽嘅修咸頓，仲有般尼茅夫同白禮頓兩大南方勢力。
計今季表現，兩軍都唔值得留低。史雲斯長期下游，今季有四成嘅主場聯賽竟然冇波入；修咸頓屆屆賣走勁人，大部分送去利物浦，陣容甩皮甩骨；近10場聯賽只得1勝，領先下成日失分，數據係繼西布朗之後最差，顯見鬥心早出問題，今場仲要作客，唔值成熱捧一方。足球不高於生命，不大於恒久不變嘅情懷，前周還見費sir喺奧脫福送紀念品俾阿仙奴領隊雲加。兩大英超傳奇，一個突然病危，一個已告別主場球迷；鬥弱嘅護級大戰新聞，又算得乜嘢？