美斯在美職無緣季後賽。
美職有美斯有Apple TV越玩越大，可惜呢位阿根廷球王半程先加盟，只能喺盃賽展現巨星風範；但佢效力嘅國際邁亞密入唔到今屆季後賽，享受唔到今屆季後賽改制，帶俾大家嘅新刺激、做唔到好似NBA嘅「老八傳奇」，可惜！
美職水平最多估值英冠中下游，但美斯肯大駕光臨，配合佢哋嘅超強直播平台；加埋美加兩國下屆有份主辦世盃，聲勢往後只會向上。佢哋今屆嘅季後賽頭段改變咗近廿年玩法，有啲學美式運動好似NBA，東西岸常規賽第8及第9名先打一場附加賽，勝方撼「一哥」；而季後賽首圈玩3場2勝唔計得失球，場場和波即射12碼決出勝負，兩邊球迷都起碼有一場主場睇，弱嗰隊有本事和晒3場，等生死戰射12碼都有晉級機會。西岸8哥肯薩斯體育會，啱啱作客4比1打敗1哥聖路易斯城SC拔頭籌，以弱勝強，增加球賽話題性，值得借鏡。總好過一啲西歐傳統盃賽，好似英聯盃可有可無，上屆曼聯冠軍獎金奀到得10萬英鎊；當然明晚坦克Sir想用嚟鍊贏紐卡素打翻身戰，又另作別論。