世盃臨近，難得開波時間大利亞洲球迷，觀戰機會必多，到時龍定蟲，早會一目了然。熱身賽，巴西慣例最搶鏡，成班歐洲隊被比下去，尤其德國不斷hea踢，太假冇人信。近屆經常有人講，冠軍總會美洲歸美洲，歐洲歸歐洲，但上屆破數據，巴西4強喺自己地頭被最終冠軍德國炒七個一皮，今屆喺俄羅斯踢，再冇乜人講係歐洲天下。
實際上，南美代表、阿根廷獨靠美斯，守力一般；巴西鋒芒太露，剛傷好嘅尼馬成眾矢之的，森巴雙防中荷西保連奴同費蘭甸奴嘅戰力，喺遇到強手時會見吃力。歐洲剛過去嘅各大主要聯賽，冠軍多早定，呢點對歐洲頂級球星體力上，會相對有利；再看頭8大奪標熱門，有6隊屬歐洲，加上俄羅斯天氣預測涼快非常，踢早場都唔會有炎夏嘅感覺，呢點對歐洲人大利，對非、亞球隊毫無著數，呢點睇分組賽可備忘。
個人熱捧法國，冷取有機會8強遇上巴西嘅大熟比利時，雖然推介有機會側埋上線，但真正王者，從來一心一意懶理走線。