數兩大洲最強代表，近6屆起碼入到8強兼攞過世界盃嘅巴西同德國當之無愧，「巴德」亦係今夏奪標首、次熱門，不過德國熱身賽已5戰不勝，而巴西剛有尼馬入靚波強勢復出，聲勢更勁；但德國人實際為先，賽前稍為退熱，唔好睇小。德國久未贏波，啱啱更將個「煙幕」推高到輸俾奧地利，不過上屆攞冠軍前，佢哋喺埋門拍跳同樣連和波蘭同喀麥隆，先搵阿美尼亞祭旗迎接分組賽；啱啱滂沱大雨，唔多願踢下，半力出擊又用久休嘅紐亞把關試陣，前線用最冇大賽經驗嘅29歲尼斯彼得臣掛帥，咁輸咪以為呃人。巴西從來風頭躉，上屆賽前最後3場友賽全勝不失一球，今夏又同一走勢；但隊波經過噚日一役，其實都睇晒嗰打法，射術超晒班嘅尼馬，必孭重飛。
巴西球星總受注目，最爆莫過於2002年朗拿度個河童頭；風頭躉尼馬剛見一頭鬈髮平凡到不得了，總覺得佢以前直髮，比起依家鬈瀟灑得多；唔知佢喺巴西決賽周首戰鬥瑞士，會唔會好似「大哨」當年咁震撼？