皇馬捧盃英雄、「大聖爺」加里夫巴利，喺歐聯決賽嘅威勢俾紅軍孭鑊門神卡利奧斯盡蓋；但「回來只有更強」呢類安慰「卡神」嘅說話，可能更適合勉勵威爾斯近代最強猛將巴利，回流英超。「卡神」犯錯唔係第一次，以紅軍嘅財力同級數，唔係高洛普力撐，根本唔需要長用一位連大國腳都未入選過嘅德國人守尾門；反而決賽最佳球員巴利，喺皇馬5季4捧歐聯，依然唔算得志，賽後暗示有可能離隊。始終28歲仔喺「銀河艦隊」長活喺C朗陰影之下，好似尼馬唔想喺巴塞做美斯影子，趁有市有價，博攞最後一份肥約，合情合理。
大聖爺目前留喺皇馬嘅賠率仲係大熱，次熱係投曼聯，第三熱係返熱刺；以巴利隻「黃金左腳」，去曼聯代保羅普巴或者「山神」，擔起左路進攻又得，打以前曼聯史高斯或朗尼全盛時期嘅攻中角色更掂。英超國際轉會窗提早喺6月8日深夜重開，轉會身價估計逾億鎊嘅巴利，到時可能係今屆世盃以外，不斷發酵嘅矚目轉會新聞。