連阿仙奴都無情講，一眾跟咗雲加搵食多年嘅子弟兵，要搵定後路。車路士來季會易帥再大搞，冇冠軍命嘅熱刺，更會起好一個比阿仙奴多幾百個座位嘅新球場，起碼聲勢贏晒；阿仙奴管理層怕球隊續成倫敦三流，急忙轉軚，送走原本有約教埋下季嘅雲加。神枱位都冇預個俾呢位68歲老人家，管理層擺明要大革新；獲聘嘅新領隊話明唔會有權買人，咁一向被寵慣、俾人笑唔識打逆境波嘅一眾雲爺子弟兵，被清洗機會遠大過留隊。
當中，喺減薪續約一事拖拉嘅韋舒亞，踢防中唔夠硬淨，傳送唔夠奧斯爾獨到，入楔難及艾朗藍斯，又易受傷，離隊機會最高。雙中堅，唔夠班嘅梅斯達菲同老退兼長期受傷患困擾嘅哥斯尼，今季成為大缺口，新帥冇可能再容忍下去。門將施治同奧斯賓拿都好危，冇進步嘅土炮，包括哥林張伯斯同洛賀丁，都有機會被叮走。借雲爺爺季尾引退嘅大新聞刺激一眾少爺「兵」嘅鬥心，主場硬淨嘅兵工廠要喺禮拜四歐霸盃先令馬體會吃苦頭，機會唔弱。