英超嘅守將季初頻頻變身帶刀侍衛入波，以前話得中場，得天下，喺英超可能慢慢變成得後衛，得天下。應屆世盃冠軍法國，今夏6人入波，後衛佔半；入到4強嘅英格蘭亦一樣。守將多功能貴得有理，唔怪得利物浦學曼城搶貴價後衛同龍門。單計英超第三輪頭9場入咗26球，後衛佔9球；車仔3連勝，都係多得左翼衛馬高斯阿朗素射門令對方擺烏龍。咁啱英超唔少左路守將都當旺，曼城嘅班捷文文迪久休復出好生猛，阿仙奴蒙利爾、曼聯勞基梳爾同熱刺維頓漢亦已入波。
列強除咗熱刺，主要打4-3-3陣式，翼衛孭起成條邊線；當中車仔嘅「沙利足球」幾吸引，進攻有夏薩特孭重飛，新簽嘅佐真奴費路又對辦，係守將質素差少少，兼要適應轉四後衛嘅新戰術。沙利要求皮球大部分時間喺對手半場，並全力壓迫對手，球員跟波唔跟人；又經常得番兩個中堅喺中圈附近分波，連防中尼高路簡迪都要多參與進攻。如果班主阿巴唔係真賣盤損軍心，今屆英超唔止曼城鬥利物浦。