踏入7月，部分頂級球員，好似英超嘅巴西幫羅拔圖法明奴、加比爾捷西斯同李察利臣，先啱啱放暑假；有啲歐洲二、三線球會，包括蘇超班霸些路迪，已要出征踢歐聯第一圈外圍賽，鬥波斯尼亞冠軍薩拉熱窩。蘇超整體水平，就如以前蘇格球會南部皇后領隊占士科拿所講，接近英甲，當然些路迪同格拉斯哥流浪應該高啲，有英冠水平；也難怪喺蘇超8連霸嘅些路迪，近年係歐聯外圍賽常客，上屆起更墮落，要喺第一圈亮相，最後輾轉入到歐霸分組賽。一支蘇超冠軍，去季打咗38場只分到300多萬鎊聯賽獎金，可以長期喺歐洲賽打滾，對球會收入極為重要。
雖然奔波，但以些路迪過去7年，初踢歐聯外圍賽嗰圈嘅主客共14戰計，錄得13勝1負僅失3球，顯然慣晒早開咧。呢圈佢哋對手係冇一位主力波斯尼亞國腳在陣嘅薩拉熱窩，照計過關穩陣。踢歐聯當熱身賽，球會今夏另一揾銀大計，係點樣將估值逾2,000萬英鎊嘅蘇格蘭左閘小將基蘭泰亞尼吊高嚟賣，引阿仙奴或拿玻里上釣。