英格蘭三大射手，隨住史達寧上輪鬥熱刺拉傷鼠蹊，加埋之前嘅哈利卡尼同拉舒福特，全部入廠「大小修」中；幸好英超今季首創季中「球員休息期」(player break)，對球會影響減少，佢哋趕得切月中起重開嘅歐洲淘汰賽梗係好，唔係季尾先復出，對三獅兵團爭夏天歐國盃更有利。今次出去「暖練」嘅英超隊唔多，狼隊同曼聯喺西班牙馬貝拉，熱點嘅超豪杜拜納阿沙巴綜合體育館，就得阿仙奴喺度。呢支今季唔識贏嘅傳統Big Six球隊，球員正好需要離開濕凍嘅英國，叉完電返嚟再搏過；聽該中心專家講，球員長時間喺杜拜咁正嘅地方作戶外訓練，有利吸多啲維他命D，對骨骼健康有幫助，咁呢支今季防線不停中「傷兵咒」嘅倫敦球隊，真係好需要囉。
兵工廠呢刻要盡快練好有西班牙中堅柏保維拿加入、傷愈嘅左閘新希望基蘭泰亞尼嘅新防線，亦要改變奧斯爾嗰種自傲心態，多重用巴西新星加比爾馬天尼利及狠棄入球荒嘅拿卡錫迪，加快前場行軍速度；下半季成功嘅話，球員就有望每季歇冬都拉大隊去歎下世界。