歐聯多一啲新鮮感
歐洲應該改返叫4大聯賽，提早入歐聯16強嘅12支球隊，當中「4大」英意西德就佔咗11隊，另一隊係荷甲長勝軍燕豪芬。「4大」壟斷，分組賽唔多刺激，或者要期待他日沙特富豪兵團特邀身份加入。西甲今屆暫時最威，5進4，賴低從來鍾情歐霸嘅西維爾；而德甲亦4進3，新仔柏林聯唔夠班。英超競爭超激烈，可惜嗰種高位壓逼、由守門員起要求用地波一路搓上去進攻，加埋場場波連補時要踢過百分鐘嘅密麻麻賽期，拖垮唔少強隊；包括今、明兩晚分踢歐聯出線生死戰嘅曼聯同紐卡素。
歐聯同「4大」係兩個生態圈。好似拜仁咁，前輪聯賽因暴雪改期，上仗聯賽復出竟話冇態，俾法福大炒，之後多踢兩場德甲就收工放冬假；不過曾失意英超嘅拜仁主帥杜曹大敗過後，又會唔會再hea踢放生曼聯？另一喺歐聯表現好過聯賽嘅德甲代表多蒙特，明晚會唔會放生PSG呢支最名不符實嘅法甲勁旅？倒想見到同組踢到殘但鬥志十足嘅紐卡素，主場殺低A米；再望多蒙特頂住唔輸，令「黑白兵」神奇出線，16強組合多一啲新鮮感。