沙特風暴越吹越烈

沙特超轉會窗下月20日先至關閉，喺容許每隊8個外援註冊下，國內四大班霸開咗季都仲入緊貨換血；上屆亞冠盃亞軍希拉爾，3億歐元都簽唔到麥巴比，但近排撬走西維爾鋼門邦奴、PSG嘅尼馬同富咸中鋒阿歷山大米祖域，霸氣冠全球。歐洲球會一旦財力唔夠，呢期唔易阻止主力走人，要自保唯有喺未來剩返大約十日(歐洲各大聯賽9月1日閂窗)掃定貨，以免喺歐亞之間嘅轉會真空期出事！

沙特球會愈掃愈狠，目標年齡層已去到20到尾嘅各地歐洲聯賽主力；連英超王者曼城嘅29歲中堅拿樸迪，都準備去艾納斯同C朗做隊友，如果下月先發生好似米祖域夏天收到沙特報價，即以罷踢態度決離倫敦，勉強佢出場，盞影響士氣。

英超上屆尾四保到命嘅愛華頓，都係得36分，上下游打開兩截，今屆踢咗兩輪，睇嚟格局不變。升班馬戰意搭夠，反而擔心傳統中下型班前景；英超成立後未降過班嘅愛華頓，全無起色又缺錢，水晶宮同狼隊仲有優質兵可供挖角，短線危機足以致命。