世盃外圍賽玩法，有鬥志有時好過有實力，連荷蘭隊長洛賓都唔信今晚有奇蹟，莫講話要贏7球出線附加賽，望瓣瓣冇嘅「橙衣兵團」今晚打敗一向鬥志強盛嘅瑞典謝幕，已一點不易。
出口術都要講本事，青黃不接嘅荷蘭，還是要徹底忘記對上兩屆世界盃闖入三甲嘅風光，隊長只係說實話。半年前又用番艾禾卡特任國家主帥救亡，神仙難變，後防戴利白蘭特同中場韋拿杜姆兩位英超兵唔係頂級；上仗鬥白俄嘅生死戰，正選3前鋒，竟有兩位係打緊土超嘅雲遜贊臣同「鹹魚翻生」嘅賴恩巴布，再加埋33歲嘅洛賓。呢個攻擊組合踢咗大半場都搞唔掂白俄，何況今場對住實而不華嘅瑞典？
盧森堡早前可以和法國，但啱啱狂吞瑞典8蛋；巴西去到玻利維亞贏唔到，賴高原唞唔到氣；其實說穿了係部分強隊，喺外圍賽穩得出線權，主力們會用hea踢心態應付太公波，球會賽事大過天。荷蘭要等下一位橫空爆發嘅超新星，方有轉機，今晚同時間，還是睇巨星級C朗點樣打敗瑞士拯救葡軍，捱夜更有意思。
