球證宜閉關深造
今季第2個國際賽期走近，英超唔計開季前劈炮嘅狼隊前帥盧柏迪古，未炒過領隊；相反其他歐洲四大聯賽中，暫時已有6位領隊落鑊。西甲最重手，已有3帥走人；德甲同英超一樣，球會未郁手，但上個國際賽已頂唔順國家隊主帥費歷克。英超暫時最尾嗰兩隊領隊都極高危，錫菲聯功勳主帥希堅保咸成下一位被炒大熱；次熱嗰位西甲前帥伊拉奧拿仲危，今夏走去南部教般尼茅夫，隊波四不像，近3仗英超全敗失10球。歐洲足球一盤大生意，包容度低，領隊人工就算奀到好似賓福特嘅法蘭克同狼隊奧尼爾，年薪都唔夠200萬英鎊，一樣教出彩虹；何況賺緊1,000萬英鎊一年嘅紅魔「坦克」同車仔「肥普」，無得用傷兵多做藉口，重建要快速。
領隊唔掂即炒補水走人係常態，不過英超對球證包容度一直好高，不斷犯錯，判罰又欠一致性；就算出名到好似安東尼泰萊同啱啱吹「阿曼戰」嘅米高奧利華，一樣麻麻。季初英超滿城風雨盡在大堆爭議判決，趁呢兩個星期，本屆嗰23位英超球證係咪應該閉關深造吓呢。