福仔振作
英超一天炒兩領隊，唔係奇聞，狼隊同修咸頓未到半程已水深火熱，炒魷行動早好過遲；但踢咗16場得5分嘅修咸頓，就算費Sir出山都難救。還好佢哋隊波仲有位好值錢嘅三獅18歲新星迪比寧，回升英超最大得着。
英超水頭充足，土炮後生有潛質，市場價值更高，跳槽人工暴升，但實力多未到歐洲頂級，心智易壞。三獅依家快到兩三年就換一代人，去到好似29歲嘅基亞利殊已淪為全冇入球能力嘅球會後備；就算強如足球先生菲爾科頓今季11次踢英超0入球1助攻，曼城成隊波鬥心明顯出現問題。兩季前仲一季入緊30球嘅27歲曼聯射手拉舒福特，孭住37萬5千英鎊周薪，被新帥打入冷宮。球員唔同領隊，尤其踢得咁沉又人工頂級，任何時期都唔易甩手。福仔得返一條路行，踢乜位置都好，盡快攞返出場機會，磨起鬥心打半季爭氣波，冷板坐得多易感冒。以佢嘅天分同身體質素，到時選擇會多，唔係遲早似佢同期喺紅魔成名嘅師兄安東尼馬迪爾，未到三十已要去希臘雅典AEK落班，隊波今季一早喺歐協聯外圍賽出局。