英超護級改制
英超唔一定精彩，今屆季尾特別失色，冠軍早定，升班馬連續兩屆包辦尾三個位置，係自英超1992年成立以來嘅第三次；5大聯賽同期只有德甲試過一次，只係修咸頓啱啱止瀉攞返1分，追平07/08年「包尾之最」打比郡全季得11分嘅羞家紀錄。以往話38分係每季英超護級基本分數門檻，呢三季唔使達標，都可保住一席位攞到起碼逾億英鎊獎金收入。英超賽會都要諗下新橋，否則中下游隊季尾hea踢問題會愈嚟愈嚴重，就算遇上財務違規扣分都未驚過。
連續兩屆「升完即全降」嘅走勢，會唔會一路下去？睇返來屆英冠直升大熱列斯聯同般尼有晒升降嘅經驗，暫時睇唔出佢哋來季有乜保命嘅良方，亦都反映現時嘅英超球隊大部分管理成熟，唔易突然甩轆。或者可仿效法、德甲設升降班附加賽，英冠就由升班附加賽嘅終極勝方，同英超尾三多踢一場生死戰，舉例令李城同葉士域治依家仲有保老命嘅機會。英超今季冇咁激烈，季尾硬仗少，相反4隊入到歐洲三大盃賽4強成大戶，分途衝擊冠軍，有失亦有得。