福仔新年發「維」
歐洲主要聯賽嘅轉會冬窗今早關門，呢段時期通常俾失意兵轉換環境，即食風險唔大，借走嘅又可以減輕人工皮費，震撼力點都唔夠籃壇NBA啱啱湖人同獨行俠互換王牌咁激。不過兩支已直入歐戰16強嘅英超兵團維拉同曼聯洗牌再嚟，同樣矚目，期待30萬鎊周薪嘅福仔下半季喺維拉重拾鬥志，不負曾係哈利卡尼接班人嘅威名。
維拉冬窗空前積極，多得沙特艾納斯睇得起21歲嘅南美奇兵杜蘭，加薪10倍同C朗做隊友，得以騰出大量資金簽入包括福仔等幾位新兵。近年「三獅精兵」失意排隊離開紅魔，艾摩廉啱啱簽入2新仔替補，變陣又換血再來，已係近年入主新帥嘅指定動作，陣容從冇穩定性可言，前路茫茫。相反維拉難得殺到入歐聯16強，再入英超前四機會仍在，今個冬窗搏到盡，目標明確；單係福仔同荷蘭快馬當耶爾馬倫踢兩翼，支援奧尼屈堅斯，呢個三叉戟夠晒卡士。成日話福仔唔鐘意踢中鋒愛踢左翼，又睇下主帥艾馬利點樣調教呢位27歲嘅「三獅之寶」，磨利劍重出江湖，再成入球機器。