上季英超曼聯啞火總共只入54球，今季就頭威頭勢，兩場已經有8球進賬，分別贏韋斯咸同史雲斯4比0。上季38輪聯賽只得一場大勝4比0，今季明顯見到紅魔火力全開，攻力不一樣。上季入球主要靠伊巴謙莫域擔大旗，個人喺英超入17球，第二高產量嘅桑馬達就只有6球，但今季進攻分布平均，盧卡古入3球，保羅普巴同安東尼馬迪爾都係2球1助攻，米希達利恩就有4個助攻。雖然拉舒福特同馬達都未有進帳，但曼聯進攻瓣數多咗，令對手相當頭痛，仲惹嚟車迷眼紅，話普巴4分鐘兩度犯規，球證只罰一黃唔公平，因為法比加斯上場正正係兩黃一紅。其實犯規就係唔啱，球證講過就算數㗎啦，幾時輪到網民話事呢！
