英超兵，今季據報平均除稅前收4萬英鎊周薪，依家新冠肺炎肆虐全球，好多人更眼紅；據報如果佢哋肯全減三成人工，一季可為英超球隊慳返5億鎊，不過英格蘭球員工會反對，話咁樣政府會少收2億鎊稅款，反不利「為國抗疫」喎。既然冇共識，大家各有各做，班霸利物浦居然撲出嚟想攞政府資助，舉國譁然，好快即要收回成命兼向公眾道歉。手緊嘅中下型班都傾緊球員減薪，連一向喺球員買賣平實嘅般尼，都爆響口話停擺估計要令佢哋損失5千萬英鎊，財政快陷困境；可見好多英超球會都係表面風光，靠電視轉播費谷大盤數。
表面上英超停擺，各隊都係輸家，但好多只係望年年留英超，長揾長有，唔降班就得；好似韋斯咸搬到新球場後，一切唔似預期，近年亂買人，球迷唔妥管理層，季中換帥又再用多幾千萬英鎊班救兵，原本好危。英超依家睇怕最快夏天先埋到尾，「槌仔幫」當唞下氣，他日復操再練好嗰陣搏過，帶頭減三成人工、幫球會減磅嘅主帥莫耶斯，先攞印象分。