10月打8號風球唔算奇事，但曼城未到冬令時間，唔單止已喺英超脫穎而出，仲「全民皆入」著晒火；踢咗8場英超，有半數淨勝對手5球或以上先至恐佈，超班姿態跟皇馬同巴塞喺西甲無異。「藍月亮」今晚歐聯對意甲一哥拿玻里，唔似斷纜，睇賽程，仲有排贏。世事未必盡在掌握中，曼城季前為咗防漏，用咗2.2億英鎊擴軍，當中七成用嚟購入守將；轉會窗關閉前，阿歷斯山齊士同莊尼伊雲斯「一攻一守」都簽唔到，但霸氣卻一直延續下去，攻無不克。睇番10月，曼城今晚對完拿玻里後，會喺聯賽對般尼同西布朗，中間聯賽盃就對狼隊，呢個13連勝走勢，唔難做到。
唔少人將現在曼城嘅狂勇，歸功大熟嘅助攻王奇雲迪布尼；不過曼城不斷換血，高柏尼、耶耶托尼同阿古路全部坐歪後，正式踏入哥帥大時代先係主因。依家英超射手榜前5位，曼城獨佔其三，喺歐聯嘅球會領先射手係中堅史東斯，攻力之強，暫掩蓋守力較緊絀問題；但財力雄厚，1月又話會添兵，踢到大超班咁款，又似乎好合理。