英超新年等開估
英超好睇只因走得快估唔到，回顧2024年，所謂傳統Big Six之中嘅熱刺同曼聯，新一年開始竟然要以下半版排名博反彈，最終會唔會救亡成功，搶返前6位置？最意想唔到嘅3連霸曼城突然冧檔，哥帥1月要班新兵，究竟佢想要即食球員、定係為球會未來重金早簽新星？或者其實係隊波根本泰半主力老退，鬥心減，哥帥已技窮，冬窗班兵最終冇用，英超歐聯兩線今季全敗走？利物浦以新帥配舊陣，半季走勢輕鬆到冇人信，爭標王牌、非洲人沙拿新年將會如願高薪續長約，會唔會之後好似一啲大球星咁，即刻走樣累紅軍腳軟？奧巴美揚當年幾乎害死阿仙奴。森林上屆護級變今年三甲分子，踢法簡單、潛力有限，靠一個「回春」嘅老箭頭基斯活特，頂到尾？成真嘅話，有啲英超Big Six都幾慚愧。
新一年英超估得中，係半自動越位系統終於出現。堂堂世界頂級聯賽，落後意甲同歐聯賽事；想球證更快判斷越位，唔想俾VAR房嘅球證玩拉線，產生更多陰謀論，又搞到賽事停頓太耐，2025年英超最期待。