打聯賽同馬拉松比賽，相似點多，一天未完，戰鬥不停。英超向來激烈，我估曼聯下半季會迫得榜首曼城好貼。筆者近一個月內已兩戰本地兩個馬拉松比賽，一個孤清、一個熱鬧，最快樂懂欣賞沿路風光。剛過去嘅渣馬，有條亞洲其中一條魔鬼賽道嘅「三隧三橋」路線，自己最難忘都係去到尾段仲要上斜踩進無盡嘅2公里西隧管道。正當大家驚到想「行過」時，管道內傳來強勁嘅音樂打氣，令唔少跑手們振奮得大叫，如多食一包能量啫喱，勉力都要走過去。香港搞大型跑步比賽，一啲唔易，賽道又難捱，但都有好多值得跑手享受嘅地方。
曼聯用天價人工簽到「山神」阿歷斯山齊士加盟，就好似馬拉松走過半途後，補番包能量啫喱、聽到強勁嘅打氣音樂，會尋回力量。佢哋同曼城喺聯賽相距12分，紅魔未必追唔到；不過曼城有理冇理，今晚會先再殺敗英冠布里斯托城，殺入聯賽盃決賽，博攞個盃仔，就好似跑緊馬拉松當中，有人遞半條蕉俾你補充下，梗係食咗先算啦。